სიახლეები

მცხეთა-მთიანეთის სახელმწიფო რწუნებულის ადმინისტრაციას, რეგიონში შემავალი მუნიციპალიტეტების მერიებსა და ა(ა)იპ-ს - „ახალგაზრდობა და ვეტერანები ეროვნული თავდაცვისა და უსაფრთხოებისთვის“ - შორის ურთიერთთანამშრომლობის მემორანდუმები გაფორმდა.

მემორანდუმს ხელი მხარის სახელმწიფო რწმუნებულმა ალექსანდრე ზაგაშვილმა, მუნიციპალიტეტების ხელმძღვანელმა პირებმა და ა(ა)იპ-ის დირექტორმა, ედუარდ ჯიშკარიანმა მოაწერეს.

შეხვედრაზე ყურადღება გამახვილდა ახალგაზრდობის როლზე ქვეყნის თავდაცვისუნარიანობის განმტკიცების პროცესში. ასევე, ხაზი გაესვა ორგანიზაციის სტრატეგიულ მნიშვნელობას ეროვნული უსაფრთხოების უზრუნველყოფის საქმეში.

მხარეებმა დეტალურად მიმოიხილეს მოხალისეთა მოსამზადებელი კურსის ამოცანები და ტერიტორიული დანაყოფების შექმნის გეგმა. განიხილეს ინიციატივა, რომლის მიზანია, თითოეულ რეგიონში ჩამოყალიბდეს მოხალისეთა რაზმები, რომლებიც, როგორც სამაშველო ჯგუფები, მუნიციპალიტეტების მიერ გამოყენებული იქნება საგანგებო სიტუაციებისა და სტიქიური უბედურების დროს. რაზმები მოხალისეთა ორგანიზაციის მიერ უზრუნველყოფილნი იქნებიან მაღალი გამავლობის ავტომობილებით, დრონებით, საველე მედიკოსებითა და საველე სამზარეულოთი.

სახელმწიფო რწმუნებულმა და მუნიციპალიტეტების მერებმა მჭიდრო თანამშრომლობისათვის მზადყოფნა გამოთქვეს და აღნიშნეს, რომ მემორანდუმის გაფორმება მეტად კოორდინირებულ მუშაობას უზრუნველყოფს.

შეხვედრას ესწრებოდნენ სახელმწიფო რწმუნებულის პირველი მოადგილე ჯონი ბერუაშვილი, მცხეთის, დუშეთისა და თიანეთის მუნიციპალიტეტების მერები, ყაზბეგის მუნიციპალიტეტის მერის მოადგილე, “საქართველოს გენერალთა კლუბის“ დირექტორი, მოხალისეთა ორგანიზაციის ტერიტორიული და ექსტერიტორიული დანაყოფის სამსახურის უფროსი და ტერიტორიული დანაყოფების მეთაურები.