სიახლეები

18 აგვისტოს დაბა თიანეთში "თიანეთობა 2024" საზეიმოდ აღინიშნა.

სახალხო დღესასწაულზე ჩამოსულ სტუმრებს თიანეთის მუნიციპალიტეტის მერმა ლევან წიკლაურმა უმასპინძლა.
ღონისძიებას ესწრებოდნენ საქართველოს საკანონმდებლო ორგანოს, მცხეთა-მთიანეთის სამხარეო ადმინისტრაციისა და ადგილობრივი ხელისუფლების წარმომადგენლები, სხვადასხვა ეპარქიაში მოღვაწე სასულიერო პირები, საპატრიარქოს ჩოხოსანთა საზოგადოების წევრები, თიანეთის მუნიციპალიტეტის მერიისა და საკრებულოს წარმომადგენლები, თიანეთის მუნიციპალიტეტის მოსახლეობა და სხვადასხვა მუნიციპალიტეტიდან სპეციალურად ამ დღისთვის ჩამობრძანებული სტუმრები.

ღონისძიების ფარგლებში, ვაჟა-ფშაველას სახელობის კულტურისა და დასვენების პარკში მთელი დღის განმავლობაში მრავალფეროვანი აქტივობები მიმდინარეობდა. წარმოდგენილი იყო სპორტული და კულტურული სანახაობები. მოეწყო საბავშვო-გასართობი კუთხეები, ხალხური რეწვის ნიმუშების გამოფენა - გაყიდვა, ფშავ - ხევსურული საყოფაცხოვრებო ნივთების გამოფენა, მთის ტრადიციული სამზარეულოს გამოფენა - დეგუსტაცია.

გაიმართა დოღი, ღია ჩემპიონატი ქართულ ჭიდაობაში და მუნიციპალური ჩემპიონატი ფეხბურთში.

სპორტულ შეჯიბრებებში საპრიზო ადგილებზე გასული მონაწილეები თიანეთის მუნიციპალიტეტის მერისგან ფულადი თანხებით დაჯილდოვდნენ.

"თიანეთობის" დღესასწაულზე ლევან წიკლაურმა "თიანეთის საპატიო მოქალაქის წოდება" მიანიჭა:

 დეკანოზ გიორგი ბერბერაშვილს

ექიმ ნანა რამაზაშვილს

თიანეთის მერიის მოხელეს- ელენე თიაბაშვილს

 ჟებოტის საჯარო სკოლის დირექტორს - ინეზა ციხიშვილს

თიანეთის სამუსიკო სკოლის დირექტორს - დარეჯან პაპიაშვილს

თიანეთის კეთილმოწყობისა და დასუფთავების სამსახურის
თანამშრომელს - რობიზონ მამადაშვილს

თიანეთის ფოსტის ყოფილ თანამშრომელს - ვალერიან ჯამაგიძეს.

თიანეთის მერმა თითოეულ მათგანს მიულოცა დამსახურებული წოდების მინიჭება და სპეციალური ჯილდო გადასცა.

ღონისძიების ფარგლებში, ასევე გაიმართა დრამერების შოუ; ჩატარდა კონცერტი ადგილობრივი შემსრულებლებისა და მოწვეული მომღერლების მონაწილეობით.

საღამოს გელა გნოლიძისა და ღამის შოუს ბენდის მონაწილეობით გალა-კონცერტი გაიმართა.

ასევე ჩატარდა ელექტრონული მუსიკის საღამო, რომელსაც დიჯეი ლაშა ქებაძე უძღვებოდა.

 ღონისძიება სადღესასწაულო ფოიერვერკით დასრულდა

ვიდეო იხილეთ ბმულზე: https://www.facebook.com/share/v/BdRg8PtpYvDBc5QV/?mibextid=oFDknk